Policia e Shtetit ka arritur të arrestojë një nga super-grabitësit e makinave brenda dhe jashtë vendit.
Ai quhet Aleksandër Qarri, i njohur si Gim Lepuri, i cili është mjaft i njohur për vjedhje makinash, por edhe pjesëve të tyre.
Policia bëri me dije se 43-vjeçari u arrestua në kuadër të operacionit “Hija e Natës”.
Sipas saj, ai është autor i të paktën 9 vjedhjeve të regjistruara në Sarandë dhe Vlorë nga 24 shtatori, deri më 17 dhjetor kur u kap në kushtet e flagrancës.
Por burime policore thonë se i ashtuquajturi Gim Lepuri është i dyshuar për mbi 110 vjedhje makinash në Tiranë, Vlorë, Sarandë deri në Itali
Ndërkohë policia ka zbardhur edhe skemën e grabitjeve që kryente 43 vjecari
Ai udhëtonte me autobus nga Tirana drejt Sarandës, ku frekuentonte rregullisht lojërat e fatit dhe akomodohej në hotele. Por në orët e para të mëngjesit, Lepuri largohej nga hotelet ku qëndronte dhe vidhte me thyerje makinat dhe më pas nisej sërish drejt Tiranës me autobus.
Aleksandër Qarri, lindur në Novoselë, por banues në Tiranë rezulton i divorcuar dhe person me precedentë të mëparshëm për vjedhje.
