Karabinerët italianë vunë në pranga një 27-vjeçar shqiptar në qytetin e Avellino-s, në jug të vendit, pasi në banesën e tij u gjetën 1 kg kokainë e një cilësie shumë të pastër dhe 11 kg marijuanë.
Gjithçka nisi nga disa sinjalizime se shqiptari ishte një person i dyshimtë në zonë. Në sajë të survejimit, policia zbuloi se ai dilte nga banesa në mes të natës, për t’u kthyer disa orë më vonë.
Pas disa muaj monitorimesh, agjentët italianë vendosën të kryenin një kontroll në banesën e tij. 27-vjeçari shqiptar, identiteti i të cilit nuk bëhet i ditur, nuk ishte një emigrant i zakonshëm, këtë karabinierët e kishin kuptuar, por nuk e imagjinonin se ai ishte një element i rëndësishëm i trafikut të drogës në zonë.
Policia zbuloi një valixhe në banesën e tij, ku 11 kg marijuanë ishte ndarë në 14 pako. Ndërsa me ndihmën e qenve të specializuar, u zbulua edhe pjesa kryesore e drogës, kokaina e fshehur në tualet. Sipas një përllogaritje të bërë nga autoritetet italiane, nëse do të hidhej në treg, droga e sekuestruar do të kapte vlerën e rreth 900 mijë eurove.
Tv Klan
