Policia e Sarandës ka ndaluar ditën e sotme një polic grek i cili qarkullonte i armatosur në qytet.
Destinacioni i policit ishte Bularati i Gjrokastrës aty ku do të zhvillohej ceremonia e 40 ditëve të Konstantino Kacifas.
Policia bën me dije se personi i ndaluar është M.G, 35 vjeç, i cili punonte si punonjës policie në Igumenicë.
M.G u arrestua në orën 9.45 në aksin rrugor “Sarandë-Gjirokastër”, në vendin e quajtur “Ura e Kranesë”, gjatë momentit që po udhëtonte drejt fshatit Bularat.
Polici grek u kap në flagrancë nga shërbimet e policisë me një armë zjarri pa leje të tipit “pistoletë” me 6 fishekë.
Thuhet se polici grek po shoqëronte nje deputet grek që është akoma i paidentifikuar.
Njoftimi i policisë
Policia arreston në flagrancë një shtetas grek me detyrë punonjës policie.
Sekuestrohet në cilësinë e provës materiale një armë zjarri e tipit “pistoletë” me 6 fishekë.
Nga Specialistët për Hetimin e Krimit në Komisariatin e Policisë Sarandë u bë arrestimi në flagrancë i shtetasit:
– M. G, 35 vjeç, banues në Gumenicë, Greqi (me detyrë punonjës policie në Igumenicë, Greqi).
Materialet në ngarkim të tij i kaluan Prokurorisë pranë Gjykatës të Shkallës së Parë Sarandë për veprime të mëtejshme për veprën penale “Prodhimi dhe mbajtja pa leje e armëve luftarake dhe e municionit”, parashikuar nga neni 278 i Kodit Penal.
