Ministria e Jashtme në Britani ka bërë të ditur se ambasadori britanik në Teheran është arrestuar për pak kohë nga autoritetet iraniane, gjatë një proteste lidhur me rrëzimin e avionit ukrainas nga Irani, ku mbetën të vdekur 176 persona.
Sipas ministrisë një akt i tillë është një ‘shkelje flagrante e ligjit ndërkombëtar’. Agjensia e lajmeve me seli në Teheran, “Tasnim”, ka shkruar se ambasadori britanik Rob Macaire është arrestuar për nxitje të protestave kundër qeverisë, gjatë një proteste përballë Universitetit Amir Kabir.
Ambasadori është mbajtur nën arrest më shumë se një orë përpara se të lirohej, ka bërë të ditur ‘Tasnim’.
U tha se ai ka qenë një prej personave të dyshuar për organizim, provokim dhe drejtim të veprimeve radikale.
Gjatë një prononcimi Sekretari i Jashtëm britanik, Dominic Raab theksoi se “arrestimi i ambasadorit në Teheran pa asnjë bazë dhe asnjë shpjegim është shkelje flagrante e ligjit ndërkombëtar”.
“Qeveria iraniane është në një udhëkryq. Ajo mund të vazhdojë marshimin e saj drejt statusit të të përjashtuarit me gjithë izolimin politik dhe ekonomik që kjo sjell me vete, ose të ndërmarrë hapa për të ulur tensionet dhe të angazhohet në një rrugë diplomatike përpara”,- u shpreh Raab.
Ambasadori britanik Rob Macaire u arrestua gjatë protestave për të shprehur zemërimin ndaj qeverisë iraniane, e cila pranoi fajësinë për rrëzimin e avionit ukrainas që shkaktoi vdekjen e 176 personave./Opinion.al/
