Një nga anëtarët e grupit që tentoi të trafikonte 1.2 ton kokainë nga Amerika Latine, në Greqi dhe më pas në Shqipëri është arrestuar nga policia italiane.
Ai është Alfred Arapi 42 vjeç nga Mirdita dhe ishte një nga personat më të kërkuar të autoriteteve greke.
Ai u arrestua në veri të Italisë teksa po udhëtonte me një makinë tip BMW me targa italiane, së bashku me dy persona të tjerë. Në momentin e arrestimit, 42-vjeçari nuk ka bërë rezistencë, raportojnë mediat italiane. Ai do të ekstradohet në Greqi për t’u përballur me akuzat e ngritura ndaj tij.
Më 25 janar u njoftua për kapjen dhe sekuestrimin e 1.2 ton kokainë në Agrinjo të Greqisë. Kokaina në Greqi kishte hyrë përmes portit privat të Katakolos dhe më pas ishte fshehur në një kompleks dhomash plazhi në fshatin Astakos.
Nga operacioni i zhvilluar nga anti-droga greke, shqiptare, spanjolle dhe DEA amerikane janë arrestuar më 24 janar 2020 Sandër Pemaj, Arbër Përdedaj, Lek Doda, Maksim Preçi, Erjon Tuci, Erlind Zotaj dhe Vanda Ciubara e dashura moldave e një prej shqiptarëve kishin rolin e pritjes, akomodimit dhe ruajtjes së drogës.
Si krerë të grupit janë cilësuar shqiptari me pseudonimin “Doktori” dhe personi me origjinë arabe Soufiane Hadduoti ndërsa lidhja mes grupeve bëhej nga Arbër Përdedaj.
Alfred Arapi përmendet në dosjen hetimore si personi që është interesuar në zonën e Astakos në Greqi për një mjet lundrues për llogari të drejtuesit të grupit i njohur me pseudonimin “Aguaverde ose Doktori”. Ai ka takuar Stavro Trantis (agjent i anti-drogës greke) i cili i është prezantuar si kapiteni i anijes. Marrëveshja mes tyre ishte që Trantis të merrte përsipër të transportonte sasinë e drogës. /Opinion.al
LEXO EDHE – I denjë për një skenar filmi, si u zbuluan shqiptarët me 1.2 ton kokainë
