Policia ka arrestuar në aeroportin e Rinasit një indian të shpallur në kërkim për pastrim parash. Sipas autoriteteve, 59-vjeçari Hitesh Patel ka lindur në Indi dhe banon në Nigeri.
Ai është kunati i dy vëllezërve indianë me pasaportë shqiptare, Nitin Sandesara dhe Chetankumar Sandesara, të cilët janë dënuar nga Gjykata e New Dehlit. Edhe ata janë dënuar në Indi për pastrim parash, në vlerën e 725 milionë dollarëve, ndërsa mësohet se Nitin Sandesara dhe Chetankumar Sandesara kanë hapur biznese të ligjshme në Shqipëri.
Dy vëllezërit Sandesara kanë qenë pronarët e kompanisë farmaceutike Sterling Biotech. Përgjatë viteve 2008-2011 ata kanë marrë mbi 725 milionë dollarë kredi nga disa banka shtetërore të Indisë, para të cilat nuk kanë shkuar në llogarinë e Sterling, por janë zhdukur përmes një rrjeti prej 300 kompanish offshore të ngritura nga vetë ata.
Sot, Interpol Tirana arrestoi kunatin e tyre Hitesh Patel, teksa një shtetas tjetër indian ka arritur të arratiset.
“Interpol Tirana në bashkëpunim me shërbimet e Policisë Rinas arrestuan provizorisht shtetasin indian me inciale H. P., në aeroportin e Rinasit në dalje nga territori i Republikës së Shqipërisë pasi ishte person i shpallur në kërkim ndërkombëtar nga Interpol Neë Delhi/ Indi”, njoftoi sot policia.
Ndërkohë, mbetet e paqartë nëse vëllezerit Sandesara ndodhen aktualisht në Shqipëri, apo janë larguar pas publikimit të skandalit. Por, arrestimi i Hitesh Patel përbën një zhvillim të rëndësishëm në atë që mund të jetë një nga skemat më të mëdha të pastrimit të parave në Shqipëri./Opinion.al
