Këngëtarja kosovare Loredana Zefi është ndaluar nga policia zvicerane, pasi së bashku me vëllain e saj Beratin, dyshohen se kanë mashtruar dhe kërcënuar një zviceranësh, duke u marrë një sasi të madhe parash.
Lajmi është bërë i ditur nga e përditshmja zvicerane “20 minuten”, e cila ka intervistuar çiftin e bashkëshortëve Petra Z 52-vjeçe dhe Hans 53-vjeç, të cilët kanë thënë se i kanë dhënë një shumë të madhe parash këngëtares dhe vëllait të saj.
Motër e vëlla dyshohet se i kanë marrë çiftit 900 mijë franga përmes mashtrimit dhe kërcënimit. Sipas çiftit nga Zvicra në fillim ata i kanë dhënë 200 mijë franga vëllait të këngëtares dhe nuk i kanë marrë mbrapsht.
Ndërkohë disa muaj më vonë Loredana Zefi i është paraqitur çiftit si vajza e një avokati të njohur zviceran, duke iu premtuar se do i ndihmonte në rrugë ligjore për të marrë paratë.
Por sipas 52-vjeçares ajo jo vetëm që nuk i ka ndihmuar, por u ka marrë edhe 700 mijë franga të tjera përmes kërcënimeve dhe mashtrimeve.
“Loredana dhe vëllai i saj, Berat, kanë marrë çdo gjë prej nesh. Thjesht çdo gjë që ne njerëzit e thjeshtë punojmë fort për t’i pasur. Vetëm prej Loredanës doja t’i jepja fund jetës”, -ka thënë gruaja për të përditshmen zvicerane.
Çifti 50 vjeçar janë shprehur se posedojnë fakte për të akuzuar këngëtares dhe vëllain e saj, përmes transaksioneve bankare të bëra për deponimin e parave. Sipas tyre për shkak të marrjes së parave ata kanë humbur edhe shtëpinë.
Çështja e këngëtares shqiptare është ende nën hetim dhe autoritetet po kryejnë një investigim edhe në apartamentin në Luzern në të cilin ajo u arrestua.
Ende nuk ka patur asnjë reagim nga Loredana lidhur me këtë çështje. Ajo është e martuar me reperin kosovar Mozzik dhe së bashku kanë një vajzë./Opinion.al/
