Ish-kandidati për deputet në Shkodër Sait Fishta, është ndaluar mbrëmjen e së dielës me urdhër të Prokurorisë, i akuzuar “Ndërtim të paligjshëm në tokë publike”.
Më parë, gjykata kishte vendosur sekuestro preventive mbi 9 pallate në ndërtim në zonën bregdetare të Velipojës. Mësohet se këto pallate janë në pronësi të subjektit “Fishta” shpk, me administrator Sait Fishta, i cili dyshohet se ka konsumuar veprën penale të “Ndërtimit të paligjshëm”. Biznesmeni i njohur i ndërtimit është ndaluar nga policia në Tiranë. Nga hetimet nga rezultuar se Fishta në vitin 2010 ka marrë 50 leje ndërtimi nga Komuna Velipojë. Sait Fishta, njihet në qytetin e Shkodrës si biznesmen ndërtimi. Ai ka ndërtuar dhjetëra pallate në Shkodër dhe dhjetëra të tillë në zonën turistike të Velipojës dhe Shëngjinit.
Fishta, i cili ka qenë sportist i njohur si mundës, për shumë vite është marrë vetëm me biznes, ndërkohë që kohët e fundit ai është aktivizuar në politikë. Fillimisht ai ishte kandidat për deputet në zgjedhjet e vitit 2009 me LSI-në dhe më pas në zgjedhjet elektorale të 2013 Sait Fishta, ka garuar për ngjyrat e PS, për t’u bërë deputet, por në të dy rastet nuk ka arritur të fitojë.
Në këtë foto, Fishta shihet bashkë me Tom Doshin dhe Kryeministrin Rama, gjatë fushatës elektorale të vitit 2013. /Panorama
