Një zyrtar i Bashkisë së Fierit është arrestuar ditën e sotme nga Shërbimi për Çështjet e Brendshme dhe Ankesat, pasi akuzohet për “Korrupsion pasiv, të kryer nga persona që ushtrojnë funksione publike” dhe “Prodhimi, mbajtja, blerja apo shitja pa leje dhe armëve të ftohta”.
Nga njoftimi zyrtar i policisë bëhet me dije se në pranga ka rënë inspektori K. R., ku sipas SHÇBA dyshohet se ka keqpërdorur atributet ligjore përmes ushtrimit të presionit për vendosje gjobash dhe masa të rënda administrative ndaj subjekteve, duke kërkuar dhe marrë shuma monetare për të mos i aplikuar këto masa.
Ndërkohë bëhet me dije se nga veprimet proceduriale të kryera, u sekuestruan provat materiale:
– 32,000 lekë, e dyshuar si produkt i ndërveprimeve korruptive;
– Armë e ftohtë, thikë dhe dorezë të inkorporuara me njëra tjetrën, e cila dyshohet se futet në kategorinë e armëve të ftohta pa leje;
– Shkop druri artizanal në formën e shkopit të bejzbollit, që përdoret për veprime të dhunshme.
Shtetasi K.R. i mbante sendet e mësipërme me vete gjatë ushtrimit të detyrës./Opinion.al
