Policia e Tiranës ka vënë në pranga një 30-vjeçare, infermiere në Spitalin Infektiv, pasi në bazë të pamjeve filmike rezulton të jetë autorja e vjedhjes së një shume parash në portofolin e shtetasit K. D., i cili ka qenë i shtruar në Spitalin Infektiv, ku ka ndërruar jetë nga COVID-19.
Mësohet se është arrestuar 30-vjeçarja Ronida Hysa, banuese në Durrës. Autoritetet informojnë se Ronida Hysa ka vjedhur edhe kartën e bankës së pacientit ku më pas tërhoqi një shumë prej 60.000 lekë.
Ngjarja është denoncuar nga i biri i të ndjerit, 25-vjeçari me iniciale F.D., pranë emisionit investigativ ‘Stop’. 30-vjeçarja akuzohet për veprat penale “Vjedhja” dhe “Vjedhja duke shpërdoruar detyrën”.
“Specialistët për Hetimin e Krimit në Komisariatin e Policisë Nr. 4, në bashkëpunim me Prokurorinë e Rrethit Gjyqësor Tiranë, kanë bërë të mundur identifikimin, lokalizimin dhe ndalimin e shtetases R. H., 30 vjeçe, banuese në Durrës.
Ndalimi i kësaj shtetaseje u bë pasi në bazë të pamjeve filmike rezulton si autorja e vjedhjes së një shume parash në portofolin e shtetasit K. D., i cili ka qenë i shtruar në Spitalin Infektiv, ku ka ndërruar jetë nga COVID-19.
Pas kallëzimit të bërë për këtë ngjarje, nga djali i të ndjerit, shtetasi F. D., 25 vjeç, i cili ka deklaruar se nga llogaria bankare e të atit ishte tërhequr shuma 60.000 lekë, specialistët për Hetimin e Krimit në Komisariatin e Policisë kanë organizuar punën për identifikimin e autorit.
Në bazë të provave filmike ka rezultuar se edhe shuma e parave është tërhequr nga shtetasja R. H., infermiere në Spitalin Infektiv, e cila ka pranuar autorësinë e ngjarjes, që është bërë mediatike edhe nga emisioni investigativ “STOP”.
Materialet procedurale do të referohen në Prokurorinë e Rrethit Gjygjësor Tiranë, për veprime hetimore të metejshme, për veprat “Vjedhja” dhe “Vjedhja duke shpërdoruar detyrën”, njofton policia./Opinion.al
