Policia e Fierit ka bërë të mundur ditën e sotme arrestimin e Emiljano Grembit, 22 vjeç, banues në Belinë Patos, i cili së bashku me kushërirën e tij Anna Malaj ishin kthyer në tmerrin e pikave të karburantit në zonën ku jetonin, që i grabisnin me armë gjatë natës.
Fillimisht policia ndaloi Anna Malaj, 33 vjeç, e cila në bashkëpunim me kushëririn e saj më të vogël kishte grabitur 3 karburante, ku vetëm në dy prej tyre kishin mundur të merrin para në shumën e 30 mijë lekëve të rinj.
Grabitjet
Shtetasi Emiljano Grembi në bashkëpunim me kushërirën e tij, shtetasen Anna Malaj (e cila u ndalua nga policia një ditë më parë) nën kërcënimin e armës, në datën 02.07.2018, në Levan, kanë vjedhur një pikë karburanti ku kanë marrë shumën prej 30000 lekësh të reja.
Në datën 07.07.2018, në Mallakastër, nën kërcënimin e armës kanë tentuar të vjedhin një pikë karburanti por pasi janë ndeshur me punonjësin e karburantit, janë larguar.
Në datën 15.07.2018, në lagjen “1 Maji” Fier, në bashkëpunim, duke kërcënuar me armë gjahu teke, kanë tentuar të vjedhin një tjetër pikë karburanti.
Materialet i kaluan Prokurorisë pranë Gjykatës së Shkallës së Parë Fier për veprat penale “Vjedhja me armë”, e kryer në bashkëpunim e mbetur në tentativë” dhe “Prodhimi dhe mbajtja pa leje e armëve dhe municionit luftarak” parashikuar nga Nenet 140, 22, 25, dhe 278 të Kodit Penal.
