Policia e Kosovës tha ka arrestuar të dyshuarin për vrasjen e një personi mbrëmjen e së dielës në Prizren.
“Gjatë bastisjes është gjetur edhe thika që dyshohet se është përdorur në rast”, tha për Radion Evropa e Lirë zëdhënësi i Policisë së Kosovës për rajonin e Prizrenit, Shaqir Bytyçi, i cili shtoi se arrestimi është bërë mbrëmjen e së dielës. Të dyshuarit i është caktuar ndalimi policor prej 48-orësh.
Prokuroria Themelore e Prizrenit tha se do të kërkojë caktimin e masës së paraburgimit për të arrestuarin, E.B.
“Prokuroria Themelore në Prizren, është duke ndërmarrë të gjitha veprimet e nevojshme hetimore për zbardhjen e plotë të rrethanave të këtij rasti tragjik”, u tha në njoftim.
Vrasja kishte ndodhur mbrëmjen e 10 gushtit, kur Policia kishte pranuar informacione se një person kishte pësuar lëndime dhe ishte dërguar në emergjencën e spitalit rajonal të Prizrenit.
Viktima, mashkull, kishte pësuar lëndime të rënda pas therjes me thikë dhe më pas ishte dërguar në Qendrën Klinike Universitare të Kosovës në Prishtinë, ku kishte ndërruar jetë.
Më 10 gusht, Kosova po ashtu u trondit nga një vrasje e trefishtë në Gjilan. Autoritetet kanë shpallur në kërkim tre persona të dyshuar. I dyshuari kryesor për këtë rast, sipas Policisë, ka të kaluar kriminale.
Nuk është e qartë se cilat kanë mundur të jenë motivet e kësaj vrasjeje, dhe prokurori që po heton rastin, Isuf Sadiku, të dielën deklaroi se është herët të flitet për motivet. REL
