Një tjetër edukatore ka rënë në pranga për dhunë ndaj fëmijëve, pas pronares së kopshtit Anjeza Shabani që u dënua për dhunë vitin e kaluar.
Bëhet fjalë për edukatoren e një kopshti privat në Tiranë, e cila u ndalua dje (e diel) nga policia pas kallëzimit të dy prindërve, se u ka dhunuar fëmijët në ambientet e kopshtit privat “4 Stinët”.
Ajo është 30-vjeçarja Denida Rexhepi, e lindur në Elbasan dhe me banim në Tiranë dhe akuzohet për veprën penale të “keqtrajtimit të të miturit”.
Rexhepi u ndalua gjatë ditës së djeshme nga efektivët e komisariatit numër 2, aty ku u bë edhe kallëzimi nga dy nënat e reja.
Policia tha se një nënë 19-vjeçare dhe një tjetër 28-vjeçare kanë bërë kallëzim në komisariat se fëmijët e tyre janë dhunuar fizikisht nga edukatorja e kopshtit “Katër Stinët” në rrugën “Nikolla Lena”.
Sipas tyre, Denida Rexhepi i ka dhunuar fëmijët më 30 dhe 31 maj, e faktuar kjo edhe nga kamerat e sigurisë që ka të instaluara në kopshtin privat.
Kamerat e sigurisë janë sekuestruar nga policia në cilësinë e provës materiale, ndërsa çështja tashmë i ka kaluar për hetim prokurorisë së Tiranës.
Kopështi në fjalë ndodhet në qendër të Tiranës, ndërmjet “Myslym Shyrit” dhe Bulevardit “Gjergj Fishta”.
Njoftimi i i policisë
Më datë 04.06.2017, Specialistët e Komisariatit të Policisë Nr 2, kanë arrestuar shtetasen:
– D R, 30 vjeçe, banuese në Tiranë, me profesion edukatore kopështi
Kjo shtetase është arrestuar , sepse me datë 04.06.2017, në ambientet e Komisariatit të Policisë Nr 2, janë paraqitur shtetaset J. B. dhe M. L., të cilat kanë bërë kallzim duke pretenduar se më datë 30.05.2017 dhe 31.05.2017, shtetasia D.R, duke kryer detyrën e saj si edukatore pranë një kopështi privat në rrugën “Nikolla Lena”, ka ushtruar dhunë fizike ndaj fëmijëve të tyre të mitur në këtë kopësht.
Në cilësinë e provës materiale janë sekuestruar pamjet filmike të kamerave të sigurisë të këtij kopështi.
Materialet proceduriale i’u kaluan Prokurorisë pranë Gjykatës së Shkallës së Parë Tiranë, për veprën penale “Keqtrajtimi i të miturit”, parashikuar nga Neni 124/b i Kodit Penal.
*foto ilustruese
