Një 28-vjeçar është arrestuar nga Policia e Shkodrës pasi ishte shpallur në kërkim për veprat penale “Plagosja e lehtë me dashje”, “Kanosja” dhe “Mbajtja pa leje e armëve luftarake dhe e municionit”.
Autoritetet bëjnë me dije se në pranga ka rënë i riu i identifikuar me inicialet M. R., banues në fshatin Baks i Ri, Velipojë të Shkodrës.
Për 28-vjeçarin, Gjykata e Shkallës së Parë Shkodër, me vendimin e datës 05.04.2022, ka caktuar masën e sigurisë “Arrest në burg”, për veprat penale “Plagosja e lehtë me dashje”, “Kanosja” dhe “Mbajtja pa leje e armëve luftarake dhe e municionit”.
Ky shtetas, më datë 22.02.2022, së bashku me shtetasit H. R., E. R. dhe R. R., të cilët janë proceduar penalisht në gjendje të lirë, pas ngjarjes, kanë goditur me grushte shtetasin K. S., 22 vjeç, banues në fshatin Pulaj Plazh, Velipojë, Shkodër. Gjithashtu, shtetasi M. R. e ka kanosur shtetasin K. S., me armë zjarri. / Opinion.al
