Specialistët për Krimet në Komisariatin e Policisë Krujë, kanë bërë të mundur arrestimin në flagrancë të Erald Nika 22 vjeç, banues në fshatin Kameras, Fushë –Krujë. Menjëherë pas ngjarjes Nika është nisur në drejtim të Laçit, por policia e Krujës e ka identifikuar autorin dhe në ndjekje e sipër e kanë arrestuar.
Ngjarja ka ndodhur ditën e djeshme në orët e mbrëmjes dhe si pasojë e një konflikti të çastit ai ka plagosur me armë zjarri tip pistoletë M. K 18 vjeç, banues në fshatin Kameras. Për pasojë, i dëmtuari ndodhet në Spitalin Ushtarak Tiranë nën kujdesin e mjekëve.
Menjëherë në vendngjarje kanë shkuar Efektivët e Policisë, të cilët bënë të mundur kqyrjen e vendit të ngjarjes, mbledhjen e provave materiale, identifikimin dhe kapjen e autorit menjëherë pas kryerjes së krimit.
Në vendin e ngjarjes u gjetën dhe u sekuestruan në cilësinë e provave materiale: arma e krimit tip pistoletë me mulli pa numër dhe dy gëzhoja, kalibri 7.62mm, mod.54.
Autori është person me precedentë penalë të mëparshëm. Materialet i kaluan Prokurorisë së Rrethit Gjyqësor Krujë për veprime të mëtejshme për veprat penale”Vrasja me dashje”e mbetur në tentativë dhe “Prodhimi dhe mbajtja pa leje e armëve luftarake dhe e municionit”./tvklan.al
