Vëllai dhe nipi i i Isa Çopës janë arrestuar mbrëmë nga policia e Durrësit. Kujtojmë se Isa Çoba në kohën kur mbante detyrën e Kundërzbulimit në SHISH u gjet i djegur brenda makinës së tij, 5 vite më parë. Autorët e vrasjes janë ende të pazbuluar.
Sakaq, lidhur me ngjarjen e djeshme, policia thotë se 23-vjeçari, Klevis Çopa (nipi i ish- oficerit të SHISH) akuzohet për trafik droge ndërsa 56 vjeçari (vëllai i Çobës) për kundërshtim të forcave të policisë.
Rreth orës 22:00, policia ka shkuar në banesën e familjes Çopa, në lagjen nr.11 të qytetit bregdetar për të shoqëruar djalin e kësaj familjeje.
Menjëherë ka reaguar kryefamiljari, Halit Çopa, i cili u ka thënë policëve nëse kishin mandat kontrolli dhe përse po e shqetësonin në orët e natës. Pas kundërshtimit, blutë i kanë vënë prangat 56 vjeçarit dhe e kanë shoqëruar në komisariat bashkë me të birin.
Ndërkohë policia sqaroi se janë sekuestruar rreth 600 gram heroinë dhe në pranga kanë rënë Julian Shaqja 25 vjeç, marinar në tragetin e anijes Durrës-Bari dhe Klevis Çopa 23 vjeç, banues në Durrës.
“Arrestimi i tyre u bë pasi më datë 08.08.2016, gjatë kontrollit të ushtruar në pikën e kalimit kufitar të pasagjerëve në Portin Detar Durrës, në çantën e dorës së shtetasit Julian Shaqja iu gjet dhe iu sekuestrua në cilësinë e provës materiale, rreth 600 gr lëndë narkotike e dyshuar e llojit Heroinë.
Në vijim të hetimeve u bë shpallja në kërkim dhe po punohet për kapjen e shtetasit:
- G. Ç., 24 vjeç, banues në Durrës, organizator i trafikut të lëndës narkotike.
- Ndërsa Halit Çopa, 56 vjeç, banues në Durrës, babai i shtetasit Klevis Çopa po ndiqet në gjendje të lirë pasi ka kundërshtuar punonjësit e policisë”, thotë policia në njoftimin e saj. /Opinion.al
*Në foto, Klevis Çopa
