Autoritetet turke kanë ndaluar tre persona me dyshimin se i përkasin grupit militant ekstremist, (IS) dhe se po planifikonin sulme në Turqi.
Arrestimet ndodhën dy ditë pasi presidenti amerikan, Donald Trump, njoftoi se lideri i IS-it, Abu Bakr al-Baghdadi është vrarë gjatë një operacioni të forcave speciale amerikane në veri-perëndim të Sirisë.
Raportohet se tre të dyshuarit po planifikonin sulme në Stamboll, gjatë festimeve të Ditës Kombëtare të Turqisë.
Gjatë ditës së martë në Turqi festohet 96 vjetori i themelimit të Republikës laike turke që pasoi Perandorinë Osmane.
Njësitë e policisë antiterror dhe të inteligjencës turke përcaktuan se të dyshuarit, kishin qenë në kontakt me njerëz, që do të siguronin mbështetje logjistike për sulmin.
Ende nuk është e qartë nëse sulmi i planifikuar ishte i ndërlidhur me vrasjen e udhëheqësit të IS-it, Abu Bakr al-Baghdadi.
Turqia ka thënë se ka ndarë informacione me Shtetet e Bashkuara – aleatin e saj të NATO-s – përpara sulmit në veri të Sirisë dhe se është krenare që ka ndihmuar në sjelljen e “një terroristi famëkeq para drejtësisë”.
