Elementë të së djathtës ekstreme në Itali të vendosur në qytetin e Torinos kishin në dispozicion të tyre një arsenal lufte dhe ndër to një raketë ajër-ajër.
Në një operacion të forcave anti-terror të Italisë, u sekuestruan dhjetëra armë lufte, simbole naziste dhe një raketë ajër-ajër, në gjendje perfekte dhe operative, në kutinë e saj të çeliktë.
Kjo ishte dhe gjetja që i shokoi më shumë autoritetet vendase pasi bëhet fjalë për një armë shumë të rrezikshme. Të tilla raketa përdoren nga ushtria e Katarit.
Disa prej personave të arrestuar në këtë operacion kishin luftuar si mercenarë në rajonin e Donbasit në Ukrainë përkrah forcave filo-ruse të cilat e kontrollojnë rajonin.
Ky fenomen është kthyer në një problematikë për vendet perëndimore në vitet e fundit pasi raportohet një numër i lartë personash që pranojnë të luftojnë si mercenarë të influencuar nga ideologji ekstreme të cilat kanë në thelb kundërshtinë ndaj Shteteve të Bashkuara të Amerikës. Në këtë kuadër autoritetet italiane kanë zhvilluar vitet e fundit shumë operacione për ndalimin e këtyre eksponentëve.
Vitin e kaluar ato arrestuan edhe një shtetas shqiptar i cili bënte rolin e ndërmjetësit për transferimin e personave nga perëndimi në Ukrainë. Emri i tij është Olsi Krutani, ekspert informatike dhe të arteve marciale, i cili deklaronte që kishte qenë pjesë e forcave speciale ruse. /Opinion.al
