Katër persona janë arrestuar nga Policia e Fierit, pasi akuzohen për “Vrasje me dashje” e mbetur në tentativë, “Vjedhja” e kryer në bashkëpunim, e mbetur në tentativë dhe “Vjedhja me dhunë”.
Policia njofton se gjatë arrestimit të tyre, dy nga autorët kanë tentuar të largohen me një makinë e cila ishte e vjedhur. Gjatë ndjekjes nga policia, ata kanë përplasur me makinë një 36-vjeçar i cili u bëri shenjë që të ndalonin.
Aktualisht 36-vjeçari ndodhet në spital dhe po merr ndihmën e nevojshme mjekësore. Ndërkohë, policia ka mundur të vërë në pranga grupin kriminal, i cili kryente vjedhje në banesa të ndryshme. Sipas autoriteteve, të arrestuarit janë; E. D., 31 vjeç, banues në Vlorë, i dënuar disa herë për vjedhje, A. L., 31 vjeç, banues në Vlorë, i dënuar më parë për vjedhje, L. N., 24 vjeç, banues në Frakull, Fier.
Këta persona akuzohen për një seri vjedhjesh;
- Në datën 30.05.2019, në fshatin Ferras, dyshohet se kanë vjedhur në banesën e shtetases E. M., ku kanë marrë 5 milion lekë, disa sende me vlerë dhe bizhuteri floriri.
- Në datën 19.11.2019, në fshatin Kafaraj, dyshohet se kanë vjedhur në banesën e shtetasit J. B., ku kanë marrë një sasi parash dhe pajisje elektroshtëpiake.
- Në datën 13.11.2019, në fshatin Frakull e Madhe, dyshohet se kanë vjedhur në banesën e shtetasit M. H., ku kanë marrë 1 milion e 700 mijë lekë dhe disa bizhuteri floriri.
- Në datën 23.01.2020, në fshatin Ferras, dyshohet se kanë vjedhur në banesën e shtetasit R. N., ku kanë marrë 2 milion e 800 mijë lekë dhe disa bizhuteri floriri./ Opinion.al
