Mjekët e spitalit të Shkodrës kanë protestuar paraditën e sotme kundër arrestimit të shefit të Kardiologjisë, Edi Smajlaj.
Protesta është zhvilluar në spitalin rajonal dhe kolegët e tij kërkojnë lirimin e mjekut, duke e quajtur një vendim absurd prangosjen e tij.
“Jo pranga”, janë pankartat që mjekët mbajnë në duar. “Jemi ketu kunder arrestimit. Eshte e padrejte. Smajlaj ka dhene kontributin e tij dhe bejme thirrje te lirohet sa me pare. Do vazhdojme protestat deri ne lirimin e tij”- thotë Skender Duka, mjek pediater.
Smajlaj u arrestuar pasi akuzohet se ka shtruar në spital dhe ka falsifikuar një kartelë mjekësore për Simon Lufin, pedagogun e Universitetit të Shkodrës të arrestuar për korrupsion.
Lufi u arrestua bashkë me një tjetër pedagog se kanë marrë para për provimet e studentëve.
Ai është shtruar në Spitalin e Shkodrës dhe Smajlaj i ka bërë një kartelë që ta mbajë aty sikur ka probleme me zemrën. Ky veprim është bërë për të shmangur një masë sigurie si arresti me burg.
