Kreu i partisë Demokratike, Lulzim Basha, ka reaguar për arrestimin e 34-vjeçarit Redjan Rraja, si një ndër autorët e atentatit ndaj prokurorit Arjan Ndoji, Andi Malokut dhe Pëllumb Muharremit.
Basha është shprehur se fakti që Redjan Rraja është i afërm i deputetit socialist, Rrahman Rraja, tregon poshtërimin e Partisë Socialiste.
Kryedemokrati ka thënë se kjo është një luftë e pastër mes bandave në pushtet të cilat kanë mbështetjen e qeverisë. Ai theksoi se është koha që vendi të shkojë në zgjedhje të parakohshme, pasi sipas tij, vetëm në këtë mënyrë mund të ndërtojmë një parlament që do të përfaqesoj interesat e qytetarëve.
“Fatkeqësisht është në vazhdën e poshtërimit të PS, të qytetarëve shqiptarë, sepse tregon se kjo është një luftë e pastër mes bandave në pushtet. Është tregues i qartë i nevojës për ndryshim të menjëhershëm për zgjedhje të parakohshme, që do iu kthejnë qytetarëve dinjitetin, të drejtën e votës dhe i fuqizojnë duke zgjedhur në Parlament e qeveri njerëz që meritojnë të udhëheqin dëshirat e tyre për ndryshim. Në funksion të kësaj është edhe turi që sapo ka nisur, një tur bashkëbisedimi dhe dëgjimi, jo vetëm i halleve, brengave e të vërtetës së hidhur si kjo që është shpalosur sot, por edhe të zgjidhjeve, të cilat duhet të prodhojnë një qeveri dhe parlament që të përfaqësojnë interesat e qytetarëve, dhe jo interesat e bandave kriminale, siç tregon dhe arrestimi i sotëm”, tha Basha./ Opinion.al
