Lulzim Basha ka ashpërsuar gjuhën, pas arrestimit të ish-deputetit Klevis Balliu, tek protesta e banorëve të Unazës së Re. Nga Korça, kryedemokrati e ka cilësuar ministrin e Brendshëm, Sandër Lleshaj dhe drejtorin e Policisë Shtetit, zagarë politikë të Edi Ramës.
“Dua t’ju përcjell sot nga kjo sallë përshëndetjet e deputetit Klevis Balliut, i cili mbahet sot në arrest politik me urdhër të drejtpërdrejt të Edi Ramës dhe zagarëve të tij politikë, Sandër Lleshaj, Ardi Veliu dhe kriminelit në krye të policisë së Tiranës. Mbahet në burg me urdhra të drejtpërdrejt politikë ndaj prokurorëve të kapur e të nënshtruar. Mbahet për të vetmin faj se kur me urdhër të banditëve iu vërsulën nënave dhe baballarëve që po mbronin shtëpitë e tyre, i spërkatën me gazin djegës dhe lotsjellës, Klevis Balliu ndodhej në krahun e qytetarëve për t’i mbrojtur nga dhuna. Ky është krimi i vetëm i Balliut, se është në krahun e qytetar”, deklaroi Basha.
“Mesazhi që Rama çon është se ai është pushteti, shteti dhe kur do ja merr frymën qytetarit, studentit, familjes dhe mbi të gjitha godet me padrejtësinë e drejtësisë së kapur edhe opozitën politike, që është bastioni i fundit i qëndresës kundër. Më lejoni t’ju them se Klevis Balliu s’ka qenë kurrë më i vendosur dhe nuk ka qeli burgu që ta trembë, edhe ne bashkëluftëtarët e tij nuk trembemi nga një kufomë politike që i ka orët e numëruara”, theksoi më tej Basha.
Ish-deputeti i Partisë Demokratike, Klevis Balliu ka rënë në prangat e policisë, pas incidenteve të ndodhura paraditen e së martës në Unazën e Re, ku banorë të Astirit tentuan t’i bllokojnë rrugën eskortës së kryeministrit Edi Rama. Mbi Balliun dhe për 3 të arrestuarit e tjerë rëndojnë akuzat për: “Kundërshtim me dhunë të punonjësit të rendit publik”, “Goditje për shkak të detyrës”, “Organizimi dhe pjesëmarrja në grumbullime dhe manifestime të paligjshme”, ”Pengimi i qarkullimit të mjeteve të transportit”, “Prishja e qetësisë publike” dhe “Shkatërrimi i pronës”./ Opinion.al
