Në orët e para të mëngjesit të sotëm policia arrestoi botuesin dhe analistin Henri Çilin, i cili akuzohet për korrupsion te organet e drejtësisë.
Lidhur me arrestimin e Çilit, ka reaguar Kryeprokurori, Olsian Çela, i cili u shpreh nga Vlora se arrestimi i tij është fryt i reformës në drejtësi.
Çela: Puna e prokurorisë, frytet e prokurorisë së pavarur, zbatimi i ligjit, reforma në drejtësi, këto janë rezultatet.
Në lidhje me konfliktin Presidencë-Ministri e Drejtësisë ai u mjaftua me këtë koment.
Çela: Nuk ka lidhje me Prokurorinë. Pyesni ata që janë kompetemnt për tu marrë me këtë gjë.
Çili është arrestuar për llogari të policisë së Gjirokastrës. Hetimi për veprën penale që akuzohet Çili ka filluar që në shtator 2019 dhe botuesi është kapur në përgjimet e prokurorisë.
Urdhër arrestet janë lëshuar nga prokuroria e Përmetit me akuzën për ndikim të paligjshëm ndaj një gjyqtari për lirimin e një personit të dënuari.
Nga prokuroria janë bërë muaj të tërë hetime e vëzhgime. 7 urdhër-arreste janë ekzekutuar në Tiranë e Përmet.
Ndërkohë, janë shoqëruar dhe persona të tjerë që mund të kenë dijeni për ngjarjen si dhe janë bërë dhe kontrolle banesash.
Po kështu, është ushtruar kontroll dhe në universitetin që drejtohet nga Çili, Universiteti Europian i Tiranës, për të gjetur personin në fjalë, i cili më pas është lokalizuar në banesën e tij, ku dhe i është bërë i ditur urdhri i arrestit.
Fillimisht është bërë shoqërimi i tij në policinë e Tiranës dhe më pas është dërguar në policinë e Gjirokastrës. Procedimi ka nisur që në shtator të vitit të kaluar, për akuza si ushtrim i paligjshëm i ndikimit te organet e drejtësisë, mashtrim, falsifikim, pastrim parash./ Opinion.al
