Lista Serbe paralajmëron daljen nga koalicioni qeveritar në Kosovë. Kështu shkruajnë mediat serbe. Veprimi është ndërmarrë një ditë pas arrestimit të Marko Gjuriç në Kosovë. Sot përfaqësues të kësaj partie udhëtojnë drejt Beogradit për të takuar presidentin Aleksandër Vuçiç, shkruan B92.
Gjatë një konference për media mbrëmë në Beograd, Vuçiç tha se vendimi për t’u larguar nga Qeveria e Kosovës i takon Listës Serbe. “Nuk do të marr vendime për ta dhe kjo u takon atyre, por duhet të vendosin me gjakftohtësi”, theksoi ai.
Ndërsa kryetari i Listës Serbe, Goran Rakiç është shprehur se po shqyrton mundësinë për tu larguar nga qeveria.
“Ne do të marrim një vendim të mençur, do të udhëhiqemi nga interesat e qytetarëve”, ka thënë Rakiç, shkruajnë mediat serbe. Sipas tij “ky nuk ishte vetëm sulm brutal klasik por një sulm terrorist më shumë mbi popullin të paarmatosur serb”.
Sakaq, mbrëmjen e djeshme serbët kanë bllokuar disa rrugë në Veri me makina e kamionë, një praktikë kjo aspak e re për ta. Një numër i madh serbësh u mblodhën në këto të ashtëquajtura “barrikada”. Rruga u bllokua në vendin e njohur si Rudarë në Zvecan, një pikë tejet e rëndësishme sepse lidh Prishtinën me kryqëzimin administrativ të Jarinjës.
Efekti zinxhir erdhi pasi një grup zyrtarësh të lartë të Serbisë dje morën rrugën për në Kosovë, ndonëse disa prej tyre nuk patën leje për t’u futur në këtë shtet. Në mesin e tyre ishte drejtori i Zyrës për Kosovën në Qeverinë e Serbisë, Marko Gjuriç, i cili hyri në veri të Mitrovicës përmes rrugëve ilegale.
Ai kishte shkuar për të mbajtur një takim me serbët, por Policia e Kosovës i vendosi prangat Gjuriçit. Pasi u mbajt disa orë në stacionin policor në Prishtinë, Gjuriç u transportua me mjete të blinduara të ushtrisë në Merdare ku iu dorëzua autoriteteve serbe. /Opinion.al
Në video: raportimi i gazetarit të Klan Kosoves per situaten sot ne mengjes ne Mitrovice
