Bashkëshortja e deputetit të Kosovës, Milaim Zeka, ka reaguar pas arrestimit të tij ditën e sotme me akuzën se është i përfshirë në një skemë mashtrimi me viza pune në Gjermani.
Përmes një shënimi në Facebook, Edlira Qefalija thotë se gjykatësit dhe prokurorët ndjenjë frikë si pasojë e presionit.
“Gjyqet publike ndaj figurave të ndryshme janë ende hallva që gëlltiten të papjekura, sepse frika që prokurorët dhe gjykatësit ndiejnë para presionit të disa shantazhuesve të paskrupullt është në fakt rezultati real i gjithë asaj çka është instaluar në Kosovën e haraçit, gazit lotsjellës, zolës, intimidimit dhe Turpit. Ju mbulojini turpet tuaja me sulme te tilla, por drejtësia do vihet ne vend”, ka shkruar Edlira Qefalija në Facebook.
Deputeti i NISMA-s, Milaim Zeka është arrestuar nga policia në Kosovë, pasi dyshohet se është i përfshirë në një skemë mashtrimi me viza pune në Gjermani. Njësiti i krimeve ekonomike i Policisë së Kosovës, vuri në pranga mesditën e sotme deputetin Zeka, pas skandalit se 920 kosovarë janë mashtruar me vizat.
