Deputeti i PD, Ervin Salianji, ka reaguar pasi SPAK lëshoi urdhër-arresti ndaj ish-kryebashkiakut të Durrësit, Vangjush Dako.
Në një lidhje në Klan News, ai e ka cilësuar një drejtësi të vonuar arrestimin e ish-kryebashkiakut të Durrësit këtë të Martë.
Po ashtu Salianji ka deklaruar se Dako është një nga personazhet më të errët të politikës në Shqipëri.
“Është një lajm apo veprim që duhet inkurajuar ky që ka marrë SPAK dhe për njerëz të tjerë me influencë dhe të lidhur me qeverinë. Është një arrestim i vonuar, por është një prej personazheve më të errët të politikës shqiptare, një njeri i denoncuar shpesh. Edhe personalisht e kam denoncuar dhe në emër të PD për lidhjet e tij me krimin, për ndarjen si plaçkë të detit, për involvimin e grupeve kriminale në zgjedhje dhe ndërhyrjen e tyre në institucionet ligjzbatuese. Ka pasur përgjime për këtë personazh të njohura si Dosja 339, pra është një person që ka shkatërruar procesin e zgjedhjeve nga viti 2011 e në vazhdim, çka e ka bërë qytetin më të varfër. Nëse do të kishim ndërhyrje të shpejtë të drejtësisë, nuk do të kishim pasojat që kanë ardhur te disa pallate pas tërmetit, pasoja me varfërimin e qytetarëve apo fuqizimin e grupeve kriminale aq sa është e pamundur për t’i çmontuar dhe padyshim do kishim jetë politike më të mirë”, deklaroi deputeti.
Ai u shpreh po ashtu se e inkurajon SPAK që të vijojë me “goditjen” për çdo zyrtar që e ka shkelur ligjin.
“E inkurajoj SPAK-un që të ketë goditje ndaj personazheve, po them goditje në kuptimin metaforik, të zbatojë ligjin. Fakti që ka arritur në nivelin ku është kërkuar arrest me burg për një ish-zyrtar, unë shpresoj që edhe akuzave të tjera që janë për këtë personazh t’u shkohet deri në fund për të parandaluar ngjarje të tjera. Shpresoj të jetë rasti i parë i një serie të zyrtarëve që duhet të përballen me ligjin. Ndodhin në mënyrë të pakontrolluar pasi largohen nga detyra, rasti i Vangjush Dakos është diskutuar dhe në media. I është lënë kohë për të rregulluar të gjitha gjërat që mund ta implikonin më tej, sërish ka mbrojtje politike. Ka vëmendje të fortë ndërkombëtare që ka arritur në këtë nivel”, tha ai.
