Policia e Sarandës ka arrestuar shtetasin Timoleon Babi, 50 vjeç, i cili kundërshtoi me armë forcat e policisë, duke u larguar nga vendngjarja për t’u kapur më pas.
Burimet policore thanë se arrestimi u bë, pasi një ditë më parë pranë hotelit në pronësi të tij në lagjen “Nr.1”, kishte pushtuar një sipërfaqe të konsiderueshme toke në mënyrë të paligjishme dhe se po kundërshtonte policinë bashkiake e cila kishte shkuar për të verifikuar rastin.
Kjo e fundit, pasi ka hasur në kundërshtimin e 50-vjeçarit, i cili njihet në zonë edhe si një biznesmen i njohur, ka kërkuar ndihmën e policisë së rendit. Në kohën kur efektivët e policisë së Komisariatit të Policisë së Sarandës janë afruar për të verifikuar telefonatën dhe për të marrë kontakt me shtetasin e lartpërmendur, Babi është larguar duke qëlluar me armë zjarri.
Të njëjtat burime bënë me dije se nga reagimi në kohë i policisë është kapur e ndaluar, ku gjatë kontrollit personal të ushtruar ndaj tij i është gjendur një sasi lëndë narkotike kanabis sativa me peshë 13 gramë, ndërsa armën e zjarrit e kishte fshehur, ku dhe po punohet për gjetjen e saj.
Menjëherë pas arrestimit, policia ka çuar dosjen në Prokurorinë e Sarandës, ndërsa vijojnë hetimet e mëtejshme.
