Ministri i Brendshëm, Taulant Balla ka reaguar pas arrestimit të 42-vjeçarit Klered Bozhanaj, i cili pasditen e djeshme plagosi me armë zjarri një efektiv policie të forcave “Shqiponja”, Edlir Alleshi.
Balla thotë se do të ketë zero tolerancë për të gjithë ata persona të cilët nuk i binden urdhrit të policit.
Reagim i Ballës
Përgëzoj Policinë e Shtetit për arrestimin e autorit të plagosjes së efektivit të shqiponjave mbrëmjen e djeshme në Tiranë.
Është momenti të kujtoj se kush nuk i bindet urdhërit/thirrjes së ligjshme të policit, ose më rëndë akoma e kundërshton me forcë, guxon ta fyejë, ta agresojë, ta kanosë, ta godasë apo larg qoftë t’i rrezikojë jetën në ushtrim të detyrës apo për shkak të detyrës, duhet ta ketë të qartë që toleranca do të jetë ZERO.
Do bëj gjithçka që një politikë/praktikë e re penale të zërë vend në këtë drejtim, duke kërkuar mbështetjen e sistemit të drejtësisë. Kuadri ligjor është aty në Kodin Penal (me ndryshimet që kam mbështetur vetë në Kuvend në vitin 2019) dhe në ligjin për Policinë Shtetit.
