Kreu i grupit Parlamentar të PS, Taulant Balla, ka komentuar këtë të hënë arrestimin e kryebashkiakut të Bulqizës, Lefter Alla.
Në një deklaratë për mediat, Balla është shprehur se PS nuk është zyrë avokatie për askënd, ndërsa shtoi se kushdo që ka shkelur ligjin do të mbajë përgjegjësi individuale.
“Çdo javë apo çdo muaj ke një kryetar në vendin fqinj, anëtar në Bashkimin Evropian që ke raste të tilla. Kjo është një gjë që nuk ka të bëjë dhe nuk ka asnjë koment nga ana jonë për këtë. E kemi thënë dhe e kemi stërthënë, Partia Socialiste e Shqipërisë nuk është zyrë avokatie për askënd. Përgjegjësinë përballë ligjit e ka secili prej tyre. Qoftë kryetari i Bashkisë Bulqizë dhe ai i Lushnjës që janë arrestuar nga SPAK dhe në të dyja rastet PS ka mbajtur të njëjtin qëndrim dhe do të vijojë ta mbajë. Në SHBA FBI-ja shkon në Shtëpinë e Joe Biden, unë nuk di ndonjë që t’i thotë Partisë Demokratike amerikane se përse FBI-ja bastis banesën e presidentit”, tha Balla.
