Elton Çica u ekzekutua me armë zjarri në vitin 2016, në një lokal në Tiranë.
Por përpara se të ishte pre e atentatit që I mori jetën, familja e tij në Tepelene ishte bërë pre e një grabitje ku grabitësit lidhën dhe rrahën edhe prindërit e tij.
Tri vite pas kësaj ngjarje, Policia ka mundur të vendosë në pranga njërin prej grabitësve.
Ai quhet Erigers Mihasi, 30 vjeç, edhe ky nga Tepelena.
Prokuroria e Gjirokastrës ka dyshime të arsyeshme se shtetasi në fjalë ka marrë pjesë në grabitjen me armë, të ndodhur më 31 mars 2015.
Mihasi do të akuzohet për veprat penale “Vjedhje me armë kryer në bashkëpunim” “Plagosje e rëndë me dashje”, “Prodhimi dhe mbajtja pa leje e armëve luftarake dhe e municionit”
Një nga bashkëpunëtorët e Erigers Mihasit në grabitje sipas prokurorisë është edhe shtetasi Robert Rama.
Kjo grabitje solli më pas edhe një serial të përgjakshëm hakmarrje.
Robert Rama. i dyshuar si bashkëpunëtor në grabitje u vra më 8 prill 2015 në Durrës.
Më 12 korrik 2015 një tjetër bashkëpunëtori të dyshuar në grabitje, të identifikuar me inicialet E. I, iu vendos poshtë makinës një sasi e konsiderueshme lëndë eksplozivi, por që u pikas pa shpërthyer.
Më 7 dhjetor 2015, po këtij shtetasi iu rivendos sërish tritol poshtë makinës, ku nga shpërthimi humbi njerën gjymtyrë, ndërsa i vëllai shpëtoi.
Fundi e episodeve të përgjakshme është kur më 1 maj 2016, në rrugën “Gjin Bue Shpata” në Tiranë, ekzekutohet brenda një lokali, Elton Çica, nga Jani Aliaj dhe Renato Milloshi.
