Ministri i Brendshëm paralajmëron se shumë shpejtë të gjithë grabitësit do të jetë pas hekurave. Në një postim në Twitter, ai shkruan se laku po ngushtohet.
“Goditja ndaj grupit të grabitësve në Rinas vazhdon. I pesti u mbyll prapa hekurave, duke e shtrënguar darën afër maksimumit. Respekt për punën e Policisë së Shtetit dhe të Prokurorisë!“”, shkruan Lleshaj.
Dëshmia e të penduarit, Alkond Bengasi çoi në arrestimin e personit të pestë që dyshohet se mori pjesë në grabitjen e 6.5 milionë Eurove në pistën e Rinasit. I arrestuari i fundit është Elton Pikli 32 vjeç nga Kruja.
Policia thotë se e arrestoi atë mesnatën e së hënës pa dhënë më shumë detaje rreth aksionit. I riu është kapur në tentativë për t’u larguar drejt Bullgarisë. Pikli dyshohet se është një nga 5 personat që hynë në aeroport me furgonin me mbishkrimin “Hetimi Tatimor”, ku ishte dhe Admir Murataj.
Dëshmia e Alkond Bengasit
Nga dëshmia e tij dhënë deri tani është bërë i mundur të mësohet se si u modifikua furgoni me logon e “Hetimit Tatimor” në servisin e Eldi Çalës në Elbasan, vëllai i Klement Çalës.
Gjithashtu ai ka qenë personi i cili ka dhënë dhe 3 emrat e tjerë, Saimir Çela, Renaldo Sula dhe Oltjon Veseli të arrestuar gjatë fundjavës së kaluar.
Mbi dëshminë e Bengasit prokuroria dhe policia kanë arritur të mbledhin prova të tjera të cilat kanë provuar se personat e arrestuar deri tani në një mënyrë apo tjetër kanë marrë pjesë apo kanë pasur dijeni për grabitjen.
Por për ish-kryeministri Sali Berisha të arrestuarit janë vetëm “koka turku”.
