Gjykata e Durrësit vendosi sot masën arrest me burg për 7 të nga të arrestuarit në lidhje me abuzimet me ndërtimet pa leje në këtë qark dhe liroi 10 të tjerët.
Ndër personat e ndaluar ishin edhe policë dhe inspektorë të IMT në Shijak. Para se atyre ti komunikohej masa, kryetari i kësaj Bashkie, Elton Arbana ka shkruar në faqen e tij zyrtare në Facebook se Bashkia e Shijakut distancohet rastet abuzive dhe se përgjegjësia e ushtrimit të detyrës është individuale.
“Bashkia e Shijakut distancohet nga çdo rast abuziv dhe shpërdorimi detyre të kryer. Për çdo veprim abuziv jemi bashkëpunues me organet përkatëse në shërbim të hetimit, madje inkurajojmë Prokurorinë dhe Organet ligjzbatuese të veprojnë kundrejt çdo shkeljeje të bërë.
Që në fillim të marrjes së detyrës time si kryebashkiak kam qenë i diktuar nga ARSYEJA përballë PËRGJEGJËSISË MORALE dhe institucionale. Busulla ime orinetuese drejt asaj se çfarë duhet të bëjmë dhe çfarë nuk duhet të bëjmë është LIGJI dhe përgjegjësia morale për të bërë MË TË MIRËN për banorët e Shijakut.
Përgjegjësia për të kryer ose jo detyrën është individuale. Nëse kjo e mirë shkelet në një formë a një tjetër duhet ndëshkuar”, shkruan Arbana.
Elton Arbana mori drejtimin e Bashkisë së Shijakut pas zgjedhjeve të 30 qershorit. Ai u vendos në këtë pozicion pavarësisht se ishte një nga personat e përfshirë në përgjimet e publikuara nga gazeta gjermane ‘Bild’ pjesë të dosjeve ‘184’ dhe ‘339’ që po hetojnë rastet e krimeve elektorale.
Përgjimet kanë interceptuar një bisedë të Arbanës me Astrit Avdylajn ku ky i fundit i kërkon që të marrë në telefon shefin e INUK për Shijakun në mënyrë që të kthejë gjobat që i ka vënë një biznesi të tij. Në bisedë e sipër Arbana i thotë Avdylajt se atë e kanë hequr nga drejtimi i INUK në Shijak pikërisht për shkak të ndërhyrjeve që ai kishte bërë.
Lexo: Përgjimi 4 / Avdylaj acarohet: S’marr dot Gjushin se është me Edin në Zvicër
Astrit Avdylaj ndërkohë ndodhet në paraburgim dhe pret që ti komunikohen akuzat nga Gjykata e Posaçme kundër Korrupsionit dhe Krimit të Organizuar.
Distancimi nga rastet abuzive që Arbana ka bërë sot në emër të Bashkisë që ai drejton i ngjan të njëjtës praktikë që Partia Socialiste ka bërë për kryebashkiakët e saj të cilët kanë rezultuar se kanë falsifikuar formularët e dekriminalizimit pasi kanë rezultuar se kanë qenë ish-të dënuar por kjo gjë nuk i ka penguar të arrijnë të kandidohen për kryetarë bashkishë. /Opinion.al
