Pas vendimit të Gjykatës së Krimeve të Rënda për të lënë në arrest shtëpie ish-Ministrin Tahiri ka reaguar përmes një postimi edhe Ambasada Amerikane e cila konsideron përparim të bërë nga Shqipëria në luftën kundër krimit të organizuar dhe korrupsionit.
Në postimin e saj Ambasada prek edhe çështjen e Arbër Çekës e po ashtu edhe arrestimin e bandës së Met Kananit në Turqi.
Reagimi nga Ambasada Amerikane
Ambasada e Shteteve të Bashkuara mirëpret përparimin e bërë nga Shqipëria në luftën e saj kundër krimit të organizuar dhe korrupsionit.
Vendimi i gjykatës për të vendosur Saimir Tahirin në arrest shtëpie është një shenjë se kjo çështje e rëndësishme korrupsioni do të vendoset në mënyrë të drejtë dhe transparente në gjykata. Arrestimi i Met Kananit në Turqi dhe 14 anëtarëve të bandës së tij kriminale në Shqipëri është shenjë e seriozitetit të policisë dhe prokurorëve për të vënë në shënjestër krimin e organizuar. Së fundi, arrestimi i trafikantit të dyshuar të kokainës Arbër Çekaj në Gjermani dhe kërkesa për ekstradimin e tij në Shqipëri është shenjë se pandëshkueshmëria ka marrë fund për bosët e krimit në këtë vend.
Përgëzojmë punën e vështirë dhe me kurajë të Policisë së Shtetit, Prokurorëve të Krimeve te Rënda dhe Gjyqtarëve të Krimeve të Rënda.
