Detaje të reja kanë dalë në lidhje me arratisjen e dy shqiptarëve nga burgu i Tirinthas në Greqi. Sipas raportimeve të mediave fqinje të burgosurit kishin prerë kangjellat e më pas kishin dalë jashtë gardhit të burgut. Arratisja është vënë re nga autoritetet e burgut rrethe orës 11:40 të paradites së të mërkurës kur rojet zbuluan se katër të burgosur, 2 shqiptarë, një maroken dhe një egjiptian mungonin.
Ajo çka e ka lehtësuar arratisjen ka qenë fakti se në periferi burgu nuk ka asnjë masë sigurie kështu që të burgosurit nuk janë pikasur dhe as janë ndjekur gjatë rrugës së tyre “drejt lirisë”. Deri në orët e vona të natës policia ka zhvilluar kontrolle dhe patrullime por pa rezultat.
Dy shtetasit shqiptarë të arratisur janë të moshave 27 dhe 48 vjeç dhe janë dënuar përkatësisht me gjashtë dhe njëmbëdhjetë vjet burg.
Arratisja ka bërë që një Prokuror Publik të urdhërojë një kontroll të brendshëm dhe hetim disiplinor për burgun e Tirinthas. / Opinion.al
