Katër të burgosur shqiptarë u arratisën gjatë transferimit me furgonin e policisë. Policia greke arriti të kapë menjëherë dy prej tyre, kurse dy të tjerë vazhdojnë të jenë në kërkim. Mediat greke kanë publikuar identitetin dhe fotot e dy shqiptarëve të arratisur: Juliano Halili 35 vjeç i njohur ndryshe me emrin “Niko” i dënuar me burgim të përjetshëm si dhe i dënuari tjetër Alfons Ndoci.
Më 29 Nëntor të vitit 2011, Halili ka vrarë me armë shqiptarin Felim Mezai 35 vjeç dhe djalin e tij të mitur rreth 3 vjeç. Ajo ishte një vrasje e porositur për prishjen e pazareve të kokainës, ndërsa Juliano Halili ishte ekzekutori.
Kurse Alfons Ndoci është i dënuar me 25 vite burg për grabitje dhe trafik droge. Edhe dy shqiptarët e tjerë që u arratisën por u kapën brenda pak minutave, janë të dënuar me nga 25 vite burg secili.
Si ndodhi arratisja
Me furgonin e policisë së burgjeve po transferoheshin në total 11 të burgosur, mes të cilëve edhe 4 shqiptarët. Nga burgu i Koridhalos, ata do të dërgoheshin në burgun e ishullit të Kretës. Në momentin që automjeti i policisë mbërriti në portin e Pireut për të hipur në traget, 4 shqiptarët mundën të shpëtonin dhe u larguan. Dy prej tyre u arrestuan pothuajse menjëherë. Sipas dëshmitarëve në vendngjarje, Juliano Halili dhe Alfons Ndoci u larguan në rrugën jashtë portit. Të njëjtët dëshmitarë i thanë policisë se ata kishin bashkëpunëtorë të jashtëm që po i prisnin me makina. Kërkimet e policisë greke për kapjen e tyre vazhdojnë ende.
Foto: Juliano Halili
Foto 2 : Alfons Ndoci
