Aksionerët amerikanë në kompaninë ARMO, kanë deklaruar se nuk kanë asnjë përgjegjësi për krizën më të fundit të kompanisë, pasi kanë shitur aksionet tek investitorët vendas shqiptarë.
Dy aksionerët amerikanë lanë të kuptohet se kanë qenë të detyruar të shesin kuotat e tyre, ndërkohë që ia lënë përgjegjësinë për krizën e krijuar palës shqiptare, sepse që prej majit nuk janë marrë me administrimin e kompanisë IRTC.
Përmes një deklarate zyrtare Herry Sargeant dhe Mustafa Abu-Naba’a thonë se aksionet e tyre në kompaninë IRTC, ja kanë shitur partnerit lokal.
“Harry Sargeant dhe z. Abu Naba’a, pronarë të GOMG Holdings Ltd, kanë kënaqësinë të shpallin marrëveshjen përfundimtare të shitjes së interesit të tyre minoritar në kompaninë IRTC në Ballsh në Shqipëri për partnerët e tyre vendas shqiptarë, duke finalizuar një proces të filluar para qershorit të vitit 2017. Me pronarët e mëparshëm, rafineria ishte e falimentuar dhe z. Sargeant dhe z. Abu Naba’a ishin aktivë për rifillimin e aktivitetit të rafinerisë Ballsh dhe bënë të mundur që 1200 punonjës shqiptarë të saj të kthehen në punë në nëntor 2016. Që nga maji i vitit 2017, me bashkëpunimin e Ministrisë së Energjisë dhe Industrisë dhe Bankers Petroleum, z. Sargeant dhe z. Abu Naba’a bënë të mundur që rafineria të operonte me kapacitet të plotë dhe praktikisht e gjithë nafta e prodhuar në Shqipëri po përpunohej në rafinerinë Ballsh. Që nga ajo kohë, dhe me nënshkrimin e marrëveshjes detyruese për të shitur interesat e tyre, z. Sargeant dhe z. Abu Naba’a nuk kanë qenë të përfshirë në ndonjë vendim të menaxhimit të IRTC ose bordit dhe kontrolli i përditshëm ka qenë gjithmonë nga partnerët shqiptarë. Blerësi tani ka tërësisht pronësinë me kontrollin operativ të rafinerisë Ballsh. Z. Sargeant dhe z. Abu Naba’a janë të shqetësuar pasi kanë dëgjuar lajmin për disa vështirësi aktuale në Ballsh, por ata nuk kanë pasur rol në menaxhim. Megjithatë, z. Sargeant dhe z. Abu Naba’a mbeten optimistë për potencialin e industrisë së hidrokarbureve shqiptare dhe do të vazhdojnë të kërkojnë mundësi në vend për të sjellë përvojën e tyre të konsiderueshme në shërbim të Shqipërisë”, përfundon njoftimi për shtyp.
Historia e IRTC
Që prej shtatorit të vitit të kaluar, Kompania Jonian Refining dhe Trading Co. –IRTC SH.A mori në shfrytëzim rafinerinë problematike të naftës, ARMO dhe në fund të vitit të kaluar filloi përpunimin e naftës, sipas një kontrate të lidhur me prodhuesin më të madh të naftës në vend, Bankers Petroleum.
Prodhimi vendas zuri rreth 30% të tregut në vitin 2017, ndërsa prej tre javësh aktiviteti u ndërpre. Fillimisht kompania që ka marrë me qira ARMO-n, iRTC (IONIAN REFINING AND TRADING COMPANY) ka anuluar aktivitetin me argumentin se do të zhvillohej remont në rafineri, por teksa kanë kaluar më shumë se tre javë dhe rroga e nëntorit nuk është dhënë, punonjësit janë informuar se aktiviteti ka pushuar.
Për 11 muajt e vitit 2017, ARMO rezulton të ketë prodhuar 156 mijë ton naftë, por ka paguar vetëm akcizë prej 50 milionë euro, ndërsa rezulton debitor për taksat e tjera (TVSH, taksë qarkullimi dhe karboni) për rreth 60 milionë euro të tjera.
