Historinë e tyre të dashurisë Armina dhe Shkëlzeni na e portretizojnë shumë bukur në rrjetet sociale. Ata shfaqen gjithmonë të dashuruar dhe Armina shpesh na zbulon detaje të ëmbla të lidhjes. Së fundmi ajo ka dhënë një intervistë për revistën Elite. Armina ka rrëfyer njohjen me Shkëlzenin, bashkëjetesën, por edhe çfarë nevojitet për të qenë një blogere e suksesshme.
“Forma sesi jemi njohur ka qënë krejt rastësore. Jemi parë diku në një bar pa e njohur njëri –tjetrin. Unë pyeta një mikeshë kush mund të ishte, pasi as unë dhe as ajo nuk e dinim kush ishte. Më pas, pas disa kohësh, u gjendëm rastësisht me miq të përbashkët, në të njëjtën tavolinë dhe aty filloi gjithçka,”
Armina rrëfeu se ajo së bashku me Shkëlzenin ende i sjellin në kujtesë përjetimet e herës së parë kur pikasën njëri-tjetrin me sy. Ajo shton se lidhja nuk ishte e menjëhershme, dhe për shumë kohë vetëm kanë komunikuar. Armina zbuloi detaje edhe të bashkëjetesës me Shkëlzenin. Ajo tregon se si bashkëjetues, Shkëlzeni është i thjeshtë dhe rutinat e tyre përputhen më së miri.
“Ditët tona nisin duke ngrënë mëngjes së bashku, më pas të dy dalim për punët përkatëse dhe takohemi në darkë për të ngrënë së bashku, për të parë një film dhe për të biseduar. Unë i adhuroj këto rutina dhe për mua janë pasuria e jetës. Fundjavave drekojmë me familjet tona dhe prindërit tanë së bashku, kryesisht të dielën mund të frekuentojmë edhe ndonjë Spa.”
Armina shtoi se ata të dy parapëlqejnë të shohin të njëjtit filma, të flenë në të njëjtin orar, të hanë dhe pinë të njëjtat gjëra. Por ajo pohon se me Shkëlzenin i ndodh herë pas here ajo që u ndodh të gjitha çifteve.
“Si çdo çift dhe ne kemi momente grindjeje. Do gënjeja nëse do të thoja “jo”. Kryesisht grindemi për gjëra të vogla, siç mund të jenë, vonesa për të shkuar diku apo diskutime të tilla. Asgjë me rëndësi fatmirësisht deri tani.”/E.L
