Armata Kolumbiane ka hedhur poshtë pretendimet e Policisë së Shtetit, se operacioni për kapjen e 613 kilogramëve kokainë në Durrës, ishte i palës shqiptare.
Në faqen zyrtare të ushtrisë kolumbiane thuhet se operacioni që u zhvillua në Maminas të Durrësit është i përbashkët.
“Në një operacion të koordinuar nga Armata Kombëtare Kolumbiane, agjencive të huaja dhe policisë shqiptare në Portin e Durrësit, u sekuestrua 613 kg kokainë”,- shkruhet në faqen zyrtare.
Ndërsa theksohet më tej, se droga e sekuestruar ishte fshehur në dyshemenë e dyfishtë të një kontenjeri të mbushur me banane, me një anije që do të vizitonte disa porte në Europë, para se të mbërrinte në Shqipëri, vendi ku dhe do shkarkohej malli.
Mediat kolumbiane shkruajne se me informacionin e dhënë nga Armata Kolumbiane, policia shqiptare arriti të zhvillonte një operacion për kapjen e një sasie rekord të kokainës, fshehur brenda një kontenjeri bananesh, si dhe arrestimin e dy personave.
Ndërkohë, media meksikane thekson se kokaina e sekuestruar nga policia shqiptare i përket një nga strukturave më të rrezikshme në Kolumbi, e njohur si ‘Clan del Golfo’, që ka kontakte me disa porte në Europë, ku dërgon drogën.
Me këtë rezultat, autoritetet kolumbiane, në bashkëpunim ndërinstitucional me vendet e Amerikës Qendrore, Shtetet e Bashkuara dhe Evropën, këtë vit, kanë arritur konfiskimin e më shumë se 7 ton kokainë.
