Transferimi i Armando Sadikut te Lugano është zyrtarizuar gjatë ditës së sotme nga klubi që ka marrë huazim lojtarin. Por ndërsa mendohej se Lugano e kishte kërkuar atë falë Tramexanit, presidenti i kësaj skuadre, Anxhelo Renxeti, ka zbuluar detaje të marrëveshjes me futbollistin, që tregojnë se në fakt ishte në interes të klubit që ai të kishte sa më shumë shikueshmëri ndaj i ishte kërkuar më përpara Zyrihut.
Renxeti ka zbuluar për mediat zvicerane se nuk ishte i interesuar që të blinte futbollistin shqiptar në fund të sezonit, përkundrazi, shpresonte që Zyrihu ta shiste sa më shtrenjtë atë në ndonjë klub tjetër në mënyrë që Lugano të kishte sa më shumë përfitime.
“Armando kishte dëshirë dhe ne na duhej një sulmues i tillë. Ai është gati, ka dëshirë, ka uri dhe dëshironte të kthehej te ne ashtu siç ne e dëshironim atë. Ekzistojnë të gjitha kushtet që të paraqitet mirë”, tha Renxeti për “tio.ch”.
“Por idenë e kishim që para se të vinte Tramexani. Pasi ai ishte prototipi i sulmuesit që na shërbente dhe nuk mund të tentonim shansin me një futbollist që duhej të përshtatej me kampionatin dhe realitetin tonë. Sadiku ka ardhur në huazim, ne do t’i paguajmë rrogën deri në fund të sezonit.
Çfarë ndodh më pas? Ne ia kemi shitur Zyrihut Armandon dhe kemi një përqindje te shitja e tij e ardhshme, për këtë arsye nuk do të blejmë kartonin e tij në fund të kampionatit. Përveçse të na ndihmojë për të arritur objektivin e mbijetesës, interesi ynë është ta vëmë në vitrinë në mënyrë që t’i ofrojmë një treg më të mirë dhe të fitojmë sa më shumë që të jetë e mundur nga shitja e tij”, shpjegoi Renxeti.
Me pak fjalë, Sadiku duhet të fillojë që tani të mendojë se në verë, do të niset drejt një skuadre tjetër.
