Armand Duka ka reaguar pas humbjes të Shqipërisë ndaj Francës me rezultatin 4:1.
Përmes një statusi në “Facebook” Duka iu bën thirrje tifozve kuqezi që ta mbështesin Kombëtaren e Shqipërisë dhe kur nuk është në ditët e saj më të mira, se me dashurinë e tyre ditët e mira vijnë shpejt. Duka shprehet se vërtetë u mposhtëm nga Kampionët e Botës, por ëndrra nuk ka mbaruar.
Kreu i Federatës Shqiptare nuk kurseu kritikën as ndaj atyre që i quan tifozë VIP, duke thënë se ata gëzohen vetëm kur Shqipëria fiton teksa shtoi se turren gjithmonë për t’u bërë pjesë e pamerituar e suksesit të të tjerëve, siç po bëjnë me kombëtaren e Kosovës.
Postimi i kreut të FSHF Armand Duka:
Dy fjalë për tifozat Vip dhe ata kuqezi
Rastësisht, sot pashë një status të një tifozeje të thjeshtë (Jo vip ) të Kombëtares Shqiptare, që mendoj në fakt se është zemra e çdo tifozi Kuq e Zi : ” KOMBËTARE, DO TË VAZHDOJ TË TË DUA, EDHE NË DITË TË MIRA, EDHE NË DITË TË KËQIJA” . Është një mesazh në fakt që përpara se ta lëshoja unë si President i Federatës së Futbollit, do ishte më e dobishme ta dëgjonim nga goja e të parëve të shtetit apo të ashtuquajturit tifoza Vip që vijnë në stadiume vetëm kur jemi në fitore.
Në fakt, nuk ka të papritura, Vipat tanë kudo ku ndodhen, në politike dhe jashtë saj, turren gjithmonë për t’u bërë pjesë e pamerituar e suksesit të të tjerëve: kështu po bëjnë sot me Kombëtaren e shkëlqyer të Kosovës, madje po turren më shpejt për të shqyer “tortën e suksesit” me shpejt se dhe vetë polikanët kosovarë apo Vipat kosovarë…Më kujtohet tre vjet më parë kur disa prej tyre ishin gati ta ndërronin foton e Ismail Qemalit me atë të Gianni De Biasit..Duke mos i kursyer duartrokitjet për Kombëtaren e Kosovës, tifozë të dashur Kuq e Zi, mos u bëni si Vipat tanë: nuk është aspak qytetari ta duash kombëtaren e vendit tënd vetëm kur është në ditët më të mira: duajeni Kombëtaren dhe kur nuk është në ditët e saj më të mira, se me dashurinë tuaj ditët e mira vijnë shpejt: u mposhtëm nga Kampionët e Botës, por ëndrra jonë nuk ka mbaruar.
