Mijëra njerëz që çdo ditë udhëtojnë drejt destinacioneve të ndryshme me kompaninë e fluturimit Alitalia, kanë mundësinë të mësojnë më shumë rreth lagjes më të mirë shqiptare: Bllokut. Të paktën kështu e ka cilësuar arkitekti Stefano Boeri në një renditje të 7 lagjeve më të mira të metropoleve më të rëndësishme, në revistën ‘Ulisse’ të kompanisë italiane të fluturimit.
“Është lagja e pasur e Tiranës, kur njëherë e një kohë, gjatë periudhës së izolimit, jetonte diktatori Enver Hoxha. Këtu mund të shihni dy anë të shpirtit të vendit: stilin rus të frymëzuar nga gangsterizmat ballkanikë, me Hummer-a të zinj dhe diskoteka dhe atë perëndimor, kafene ku dallohet qartë ndërthurja e artit me intelektualen, sjellë nga ata që nuk u pëlqen të duken dhe vijnë në Shqipëri për të hapur biznes.”
Kështu ka përshkruar Stefano Boeri zonën e ish-Bllokut, duke e renditur në vend të tretë në listën prej 7 lagjeve më të mira. Arkitekti italian është një emër jo pak i njohur për Shqipërinë. Në janar të vitit të kaluar është shpallur fitues nga Ministria e Zhvillimit Urban, për hartimin e planit urbanistik të Tiranës. Ndaj nuk e dimë nëse ai ka qenë objektiv në vlerësimin e tij, apo është ndikuar nga raporti profesional me vendin tonë dhe lidhjet me kryeministrin Rama.
Megjithatë kjo mbetet një reklamë shumë e mirë për një nga zonat më me sharm dhe më të gjallëruara të kryeqytetit dhe Shqipërisë.
Lagjet e tjera të përfshira në listë mund t’i shihni të renditura më poshtë:
Kala Ghoda, Mumbai
Quartiere Francese, Shanghai
Blloku, Tirana
Galata, Stamboll
Chelsea, New York
Citta vecchia, Taranto
Maspero, Cairo
/anabel
