Disa nga arkitektët e fushatave presidenciale të Donald Trump janë ribashkuar në Shqipëri, ndërsa përpiqen të ndihmojnë një kandidat Trump-ian të triumfojë në zgjedhjet e kësaj fundjave. Kështu e nis artikullin e saj agjencia e njohur e lajmeve, Associated Press.
Ky grup përfshin Chris LaCivita, i cili shërbeu si bashkëmenaxher i fushatës së përpjekjes së suksesshme të Trump në vitin 2024, anketuesin e Trump prej kohësh, Tony Fabrizio, dhe Paul Manafort, i cili shërbeu si kryetar i fushatës së Trump në vitin 2016 përpara se të dënohej në vitin 2018 për krime që përfshinin lobim të fshehtë për ish-presidentin pro-rus të Ukrainës.
Treshja, thuhet në artikull, po punon për ish-kryeministrin dhe ish-presidentin Sali Berisha, kreun e Partisë Demokratike të opozitës së Shqipërisë, i cili po sfidon kryeministrin Edi Rama të rikthejë demokratët në pushtet edhe pse ai pret gjyqin për akuzat për korrupsion.
“Është e vetmja Parti Demokratike për të cilën do të mendoja ndonjëherë të punoja”, tha me shaka LaCivita ndërsa drejtohej për në Shqipëri, për udhëtimin e tij të tretë para zgjedhjeve të së dielës.
Berisha, i cili shpreson që administrata e re do të tërheqë sanksionet që e ndalojnë të hyjë në SHBA, ka nënshkruar gjithashtu një kontratë dyvjeçare prej 6 milionë Dollarësh me Continental Strategy, një firmë republikane konsulence dhe lobimi.
Stafi i saj përfshin Katie Wiles, vajzën e shefes së stafit të Shtëpisë së Bardhë, Susie Wiles, e cila së bashku me LaCivita-n, udhëhoqi fushatën e Trump. Katie Wiles nuk është e përfshirë me klientin.
Melissa Stone, një zëdhënëse e Continental, tha për një tjetër media prestigjioze, gazetën Uashington Post, se puna e kompanisë fokusohej edhe në heqjen e sanksionimit “non grata”, duke sqaruar se vendimi i administratës Biden ishte politik.
“Puna jonë po financohet nga një biznesmen amerikano-shqiptar dhe udhëheqës aktiv në diasporën shqiptaro-amerikane që e do Amerikën dhe e do Shqipërinë. Si pjesë e punës sonë për të përmirësuar marrëdhëniet dypalëshe midis Shqipërisë dhe Shteteve të Bashkuara, ne po i drejtojmë një peticion aktiv Administratës Trump për të nisur një rishikim të plotë dhe përmbysje të përdorimit si armë të Seksionit 7031(c) të epokës së Biden kundër udhëheqësve konservatorë dhe pro-amerikanë, përfshirë Presidentin Sali Berisha”, tha ajo.
Ndërsa Asociatted Press përmend faktin se konsulenca e huaj ka qenë prej kohësh një mënyrë popullore për strategët amerikanë nga të dyja partitë për të fituar para midis cikleve zgjedhore.
Por vendimi i Berishës për t’u mbështetur në duart e Trump dhe për të nxjerrë në pah përfshirjen e tyre e bën të qartë se sa të vlefshëm mund të jenë ata për kandidatët që përpiqen të shfrytëzojnë ndjenjat populiste dhe të përsërisin ngritjen e Trump, – thuhet në artikull, në të cilin nënvizohet se “në Shqipëri, si në shumë vende të tjera, të shikohesh si njeri që ka lidhje të ngushta me SHBA-në dhe udhëheqësit e saj konsiderohet gjithashtu një aset i madh”.
Por a do të sjellin konsulentët e rinj një fitore të shumëpritur?
“Ky është një vend ku, siç e dini, ndërhyrja e Amerikës në zgjedhjet e tyre inkurajohet, apo jo? Kudo tjetër, jo aq shumë”, citon Associated Press, një deklaratë të Cris LaCivita. Tv Klan
