Gjykata e Posaçme kaloi për gjykim dosjen e ish-zv. ministres së Brendshme, Rovena Voda, me akuzën e “ushtrimit të ndikimit të paligjshëm”. Brenda dhjetë ditësh pritet të hidhet shorti, ku do të caktohet trupa gjykuese dhe seanca e parë, ku nis hetimi në themel ndaj ish-zv.ministres.
Voda akuzohet nga SPAK se ka marrë para nga shtetasit Majlinda Hasani dhe Florida Beu, për të ndikuar te zyrtarët në ish-Ministrinë e saj për t’i punësuar.
Siç thuhej në njoftimin e SPAK, “në përfundim të hetimeve paraprake për këtë procedim penal janë mbledhur prova me të cilat provohet se, e pandehura Rovena Voda, në cilësinë e Zëvendësministres në Ministrinë e Brendshme, ka pranuar dhe ka marrë përfitime monetare dhe përfitime materiale të padrejta nga të pandehurat Majlinda Hasani dhe Florida Beu”.
“E pandehura Rovena Voda është akuzuar se ka kryer veprën penale “Ushtrimi i ndikimit të paligjshëm ndaj personave që ushtrojnë funksione publike”, të parashikuar nga neni 245/1, paragrafi (2) i Kodit Penal, sipas përmbajtjes së kësaj dispozite para ndryshimeve të kryera me ligjin nr.43/2021.
Ndërsa, të pandehurat Majlinda Hasani dhe Florida Beu janë akuzuar se kanë kryer veprën penale “Ushtrimi i ndikimit të paligjshëm ndaj personave që ushtrojnë funksione publike”, e kryer në bashkëpunim, të parashikuar nga nenet 245/1, paragrafi (1) dhe 25 të Kodit Penal, sipas përmbajtjes së kësaj dispozite para ndryshimeve të kryera me ligjin nr.43/2021”, theksonte SPAK.
Voda ndodhet aktualisht në masën e sigurisë “arrest shtëpie” për veprën penale “ushtrimi i ndikimit të paligjshëm ndaj personave që ushtrojnë ndikime të paligjshme”.
