Finalja e “The Voice Of Romania” këtë mbrëmje kishte të ftuar edhe këngëtaren shqiptare Arilena Ara. Prej disa ditësh, Arilena na lajmëroi se do të jetë e ftuara speciale e finales së madhe të Rumanisë, vendi që e ka mirëpritur pak muaj më parë artisten shqiptare dhe ka kënduar bashkë me të “Nëntorin” në gjuhën shqipe.
Suksesi i këtij viti, pak para publikimit të albumit të parë të Arilenës, s’mund të finalizohej më mirë se kaq. Koncerti pas koncerti, projekt pas projekti dhe, në fund, edhe një album me të gjitha këngët hite të Arilenës.
Në videon e mëposhtme, Arilena ishte në provat e fundit para performancës live në “The Voice Of Romania”, por skena e madhe që sonte ka marrë vëmendjen e mijëra adhuruesve të muzikës ka edhe një të ftuar special që ka ardhur enkas nga Italia.
Alessandro Safina, tenori i famshëm italian, ka ardhur enkas për të qenë pjesë e perfomancës finale të këtij edicioni në Rumani. Safina është përzgjedhur edhe të këndojë së bashku me një prej finalistëve të The Voice.
Në një kohë kur suksesi i “Nëntorit” nuk ka të ndalur edhe me versionin anglisht, Arilena nuk ka ndër mend të presë festat e Vitit të Ri për të zbuluar surprizën e madhe që ka për fansat e saj. Artisja i ka mbledhur të gjitha këngët e veta në një album, të cilin do ta publikojë shumë shpejt.
Madje, sonte ajo ka lajmëruar edhe në llogarinë e saj në Instagram se është duke përgatitur klipin e single-t të parë të ri nga katër këngët e reja, “Snow in december.”
