Veç ushtrisë, Drejtori i përgjithshëm i Policisë së Shtetit tha se do të marrin përsipër drejtimin dhe menaxhimin e sigurisë së aeroportit “Nënë Tereza”, që deri më tani garantohej nga kompania private e koncesionarit. Sipas Ardi Veliut sigurinë tashmë do ta menaxhojë Komisariati i Policisë së Rinasit.
“Ne jemi duke punuar edhe për rritjen e parametrave të sigurisë, të cilat pavarësisht kërkesave të vazhdueshme të Policisë së Shtetit, në momente të caktuara nuk kemi gjetur bashkëpunimin nga kompania që është përgjegjëse. Nisur nga kjo, sot shefi i komisariatit të Policisë së Rinasit merr edhe përgjegjësinë e drejtimit, menaxhimit, kontrollit dhe bashkëpunimit me kompaninë e sigurisë në aeroport, për të bërë të mundur kthimin e sigurisë në aeroport. Për këtë do kërkojmë çdo ditë rritjen e parametrave të sigurisë”, tha drejtori i Përgjithshëm i Policisë së Shtetit Ardi Veliu.
Ndërkohë grabitësi që mbeti i vrarë mesditën e së martës, pas marrjes së disa miliona eurove në pistën e Aeroportit Ndërkombëtar të Rinasit, është Admir Murataj.
Viktima u identifikua nga bashkëshortja dhe vëllai i tij, në morgun e kryeqytetit.
Të afërmit u thirrën pasi Policia Shqiptare e kishte identifikuar me parë nëpërmjet gjurmëve të gishtërinjve, që kishte dërguar menjëherë pas ngjarjes në Greqi, ku Murataj ishte i skeduar./Opinion.al
