Një person me rrezkshmëri të lartë dhe i shumëkërkuar është arrestuar dje nga Policia e Shtetit, pas një përballjeje rastësore me një efektiv policie, që përfundoi në përdorimin e armëve.
Në një intervistë televizive ne News 24, Drejtori i Policisë së Shtetit Ardi Veliu tha se për arrestimin e Orgest Bilbilit, më herët kishte patur disa operacione, që nuk kishin arritur në sukses. Megithatë Veliu është treguar i kursyer në përgjigjen e tij lidhur me këtë rast.
“Edhe për personin që përmendët janë organizuar disa raste operacione pavarësisht se jo në të gjitha rastet janë të suksesshme se jemi të detyruar të vlerësojmë informacionet e të marrim masat e nevojshme. Edhe për këtë rast janë organizuar disa operacione të njëpasnjëshme. Informacione kemi pasur kanë qenë të natyrave të ndryshme por jo në të gjitha rastet ia kemi arritur që t’i kapim”, u shpreh ai duke pohuar më tej se grupi hetimor është duke punuar mbi informacionet që ka, lidhur me veprimtarinë e këtij personi.
Të premten e 10 Prillit, në rrugën ” Sitki Çiço”, në afërsi të një shkolle, punonjësi i Policisë së forcës së posaçme “Shqiponjat”, i ka kërkuar një shtetasi lejen e daljes dhe dokumentin e identifikimit.
Shtetasi Orgest Bilbili, 30 vjeç, nga Lushnja, e ka kundërshtuar punonjësin e Policisë dhe është larguar me vrap në brendësi të lagjes.
Punonjësi i Policisë e ka ndjekur dhe gjatë ndjekjes 30-vjecari i ka drejtuar pistoletën punonjësit të Policisë, duke e kërcënuar për ta vrarë.
Punonjësi i Policisë i ka bërë thirrje të hedhë armën dhe të dorëzohet, por shtetasi Orgest Bilbili nuk i është bindur urdhrit të punonjësit të Policisë dhe ka vijuar lëvizjen me pistoletë në dorë.
Në zbatim të procedurës standarde të punës, punonjësi i Policisë ka qëlluar njëherë në ajër për ta paralajmëruar, ndërkohë që 30-vjeçari i ka drejtuar armën, për të qëlluar punonjësin e Policisë.
Në këto rrethana punonjësi i Policisë, i gjendur në kushtet e mbrojtjes së nevojshme, ka qëlluar në drejtim të 30-vjeçarit, duke e plagosur atë.
Fatkeqësisht, është plagosur jashtë rrezikut për jetën edhe shtetasja M. P., rreth 30 vjeçe, kalimtare e rastit.
Nga verifikimet e bëra rezulton se shtetasi Orgest Bilbil ishte person i shpallur në kërkim dhe me rrezikshmëri të lartë shoqërore, i dyshuar për një sërë ngjarjesh të rënda kundër personit në qytetin e Lushnjës.
Gjithashtu i dënuar dhe me 7 vjet e 4 muaj burg, për veprën penale ”Trafikim i narkotikëve”./ Opinion.al
