Ish-Sekretari i Përgjithshëm i Partisë Demokratike, Arben Ristani mendon se Lulzim Basha duhet të hapë partinë ndaj individëve me eksperiencë që kanë kontribuar në jetën publike.
Ai i referohet precedentit të vitit 2004, kur Sali Berisha solli prurje të reja në parti për të kontribuar në procesin e politik-bërjes. Ndër njerëzit që atëherë u anëtarësuan në PD ishte dhe vetë kryetari aktual Basha.
“Berisha në vitin 2004 e hapi Partinë Demokratike, tërhoqi të gjithë kontribuesit në PD, qofshin ata edhe ish-kundërshtarë të tij të mëparshëm. Pra është një shembull që ne e kemi dhe kemi brenda forcës sonë politike dhe që unë ngul këmbë që duhet bërë që Partia Demokratike të bashkohet. Të hapet, të thërrasi të gjithë ata që kanë çfarë t’i thonë publikut shqiptar që kanë kontribuuar që kanë eksperiencë dhe që mund të japin për Partinë Demokratike”, tha Ristani në një intervistë televizive.
Ai shtoi se është shumë e rëndësishme që PD të përcaktojë qartë objektivat e saj dhe theksoi se duhet të ketë një përputhje midis nevojave të individëve dhe nevojave të organizatës ku ata bëjnë pjesë.
“Duhet të kemi të parin qëllimin, ku duam të shkojmë, duam ta sjellim PD-në në pushtet apo jo? Kjo do qartësi edhe për rrugën që duhet të ndjekim sepse nuk duhet të gjendemi si në një pyll të errët ku provojmë të ecim majtas apo djathtas. Na duhet një rrugë e qartë se ku duhet të shkojmë dhe çfarë duhet të bëjmë për të arritur qëllimet e organizatës, pra të PD-së. Këtu duhet gjetur momenti që dëshirat e brendshme apo nevojat e individit të përputhen me nevojat e organizatës”, u shpreh Ristani. /Opinion.al
