Mos ekstradimi i Arben Frrokun në Shqipëri duket se ka krijuar konflikte në politikën holandeze. Deputetët e partive të ndryshme politike janë kundër vendimit të Gjykatës së Hagës për të mos ekstraduar Frrokun. Gjatë një debati televiziv, deputetët janë shprehur se është e papranueshme që vrasësi i një polici të qëndrojë në Holandë dhe madje, ai mund të lirohet.
“Kjo situatë na kërcënon të gjithëve. Ne duhet të bëjmë gjithçka që ai të qëndrojë prapa hekurave, ose të largohet nga vendi ynë. Ne nuk mund të kthehemi një port të lirë për kriminelët”, janë shprehur deputetët holandez.
Në vendimin e Gjykatës së Hagës për Arben Frrokut, i cili është dënuar me burgim të përjetshëm nga Gjykata e Apelit për Krime të Rënda për vrasjen e ish-kryekomisarit të Kombinatit Dritan Lamaj, thuhet “se dënimi që i është dhënë në Shqipëri, është dhënë bazuar mbi motive politike duke shtuar se Frrokut i rrezikohet jeta”.
Frroku është dënuar nga Gjykata e Apelit me burg përjetë për vrasjen e komisarit Dritan Lamaj në shkurt të 2013. Pas një kalvari gjyqësor, në Prill të 2015-s Arben Frroku u shpall i pafajshëm nga Gjykata e Krimeve të Rënda.
Pasi doli nga qelia, Frroku u largua nga Shqipëria ditën që Apeli i Krimeve të Rënda rrëzoi vendimin e Shkallës së Parë dhe vendosi dënim me burgim të përjetshëm për Arben Frroku. Ky i fundit u kap në Holandë me pasaportë false disa muaj më vonë./ G.F Opinion.al
