68-vjeçari Sabri Haka nga Fushë-Kruja mbahej në masën e sigurisë “arrest me burg”, si i dyshuar për drogë. Pas investigimit të emisionit “Boom”, Gjykata e Apelit vendosi ta lërë të lirë të moshuarin invalid, duke i caktuar masën “detyrim paraqitje”.
Avokati apeloi vendimin e Gjykatës së Krujës e cila e kishte lënë në arrest me burg për 45 ditë të moshuarin. Ndërkohë që e kishte cilësuar si të ligjshem arrestimin në flagrance të 68-vjeçarit, edhe pse ky i fundit nuk ishte ndaluar në kushtet e flagrances, por në shtëpine e tij.
Gjykata e Apelit në Tirane rrëzoi vendimin e Gjykatës së Krujës dhe e ka liruar nga burgu të moshuarin, duke e lënë me “Detyrim Paraqitje”.
Avokati, Ilir Kurti u shpreh se “Gjykata e Apelit ka vendosur vlerësim të paligjshëm të arrestit dhe caktimin e masës “detyrim paraqitje”. Kjo ishte edhe në bazë të kërkesës tonë. Jo që kishim lidhje me elementët e veprës penale për të cilat kishte ngritur dyshimin prokuroria e Krujës, por për të ndihmuar prokurorinë për aq sa informacione Sabriu ka”.
Djali i Sabriut thotë: “Më mirë vonë se kurrë, por drejtësia pak me vonesë, por doli. Ju falenderoj. Drejtësia është vështirë të gjendet këtu në Shqipëri. Ishte e padrejtë. Kur dicka e bën, do vuash pasojat, por kur dicka që nuk e bën dhe vuan pasojat kjo është e papranueshme”.
Ndërsa, Sabri Haka pasi la qelinë e paraburgimit, u shpreh: “Unë u arrestova në mënyrë jo të ligjshme. Në këtë kohë fëmijët kishin marrë emisionin BOOM dhe çdo gjë doli në shesh. Në dhomë kisha 6 veta. Ata ishin të moshës 45 vjec e poshtë, më i vjetri isha unë. Ushqimi nuk ishte i përshtatshëm për moshën time. Më munguan fëmijët e vegjel gjatë kohës që isha në burg. Faleminderit emisionit Boom që më ndihmoi të zbardhet e verteta, se po të ishte për prokurorinë e Krujës unë akoma në burg do isha sot”.
