Gjykata e Apelit në Kosovë ka lënë në fuqi dënimin prej nëntë muajsh burg, që gjykata e shkallës së parë, kishte dhënë ndaj kryetarit të Federatës së Futbollit të Kosovës (FFK), Agim Ademi.
Ai sëbashku me një person tjetër akuzohen se gjatë periudhës kohore 12 korrik – 12 shtator 2012, me qëllim të përfitimit material kanë kërcënuar dhe sulmuar Dritëro Kadollin, duke e detyruar të bëjë veprime në dëm të pasurisë së tij, respektivisht të bëjnë përfitim të pa drejtë në shumën prej 30 mijë euro, apo një veturë të tipit “BMW X5”, e cila më pas pretendohej t’i dorëzohej Kryesuesit të Asamblesë Komunale të Prishtinës, Sami Hamiti, duke kryer veprën penale “detyrimi në bashkëkryerje” sipas Kodit Penal të Kosovës.
Lidhur me këtë akuzë, Gjykata Themelore në Prishtinë, më 5 korrik 2019, kishte shpallur fajtor Agim Ademin dhe Muharrem Ramën për veprën penale, “detyrim në tentativë”.
Në vendimin e sotëm Gjykata e Apelit ka lënë në fuqi dënimin me 9 muaj burg edhe për bashkëpuntorin e Ademit, Muharrem Rama.
Vendimi i marrë nga Gjykata e Apelit është i formës së prerë dhe do të ekzekutohet brenda 15 ditësh. /Opinion.al
